KUCHING: Penguna jalai alun di mengeri tu dilalau nambah tikas pengelikun sereta bejimat lebuh deriba kelebih agi di jalai alun ti basah berindik ari musin landas.

Berindik ari pengawa muka sesyen besekula 2026 kena 12 Januari tu, Dewan Bandaraya Kuching Utara (DBKU) chukup ngemerat sukut pengelikun penguna jalai alun ba gaya hari ti enda tentu tu.

Datuk Bandar Kuching Utara, Datuk Hilmy Othman madah, ujan ti suah nyadi sebarang maya sereta penusah bah ti nyadi di sekeda genturung bisi pengulih ngeruga pengelanchar arus trafik.

Iya madah, kelebih agi tumu pagi lebuh bala nembiak nurun ke sekula enggau orang nurun gawa sereta tengah hari lebuh nembiak pulai ari sekula.

“Aku berati ke gaya hari ti enda tentu enggau penusah bah ulih ngeruga pengelanchar arus trafik.

“DBKU chakah ngengkah raban Trafik Warden di endur ti udah dikelala suah napi penanggul sekut,” ku iya ba sebengkah penerang.

Tampung iya, inisiatif nya dikena nentu arus trafik lanchar enggau nambah tikas pengelikun penguna jalai alun.

“Nya alai, mensia mayuh dilalau meri kerejasama tegut ngagai raban Trafik Polis DiRaja Malaysia enggau Trafik Warden DBKU ti bejalaika pengawa nengah pengawa nitih ke semua atur sida enggau pal jalai dikena nyaga pengelikun begulai,” ku iya nyemetak.