PADAWAN: Mensia mayuh berasai irau enggau penyadi kes rabies ba menua tu.

Chairman Kaunsil Mengeri Padawan (MPP), Tan Kai madah, kaunsil sida ngerikod pemadu tinggi kes rabies ari 26 kaunsil bukai.

“Ba baruh MPP tu tadi, bisi 27 jelu lelang ti udah ditangkap baka 11 iku mayau enggau 16 iku ukui.

“Majlis Bandaraya Kuching Selatan (MBKS) mega udah nangkap 10 iku ukui enggau dua iku mayau seraya Dewan Bandaraya Kuching Utara (DBKU) udah nangkap tiga iku mayau aja.

“Entara tiga kaunsil nya tadi, MPP ngerikod kes pemadu tinggi nitih pansik ari opis pengerai.

“Tambah mega, sitak Padawan nya 15 kali lipat pemesai ari sitak dipegai MBKS,” terang iya.

Tan Kai bejaku munyi nya lebuh ditanya pemberita rambau penemuai basa ngagai opis iya, ditu tadi.

Iya madah, beduduk ari kes rabies ti majak ngerekai, ukui ti dilepas enggau bekedayau sigi ditangkap lalu enda tau diambi agi.

“Kami mega bisi palan munaska jelu tu lalu tu sebagi ari chara nagang kes rabies ari majak ngerekai ba menua tu,” ku iya nyemetak.

Seraya nya, Tan Kai mega madah, bisi 420 iku jelu lelang udah ditangkap ari bulan Januari nyentuk bulan April 2023 nitih pansik ari sida MBKS.

Iya madah baru, bisi 1,175 iku ukui lelang udah ditangkap ba taun 2022.

Nya alai, Tan Kai ngelalau mensia mayuh ngurung jelu tupi sida enggau manah dalam rumah kelebih agi ukui ngambi enda bekedayau.

Iya mega ngelalau mensia mayuh nganjung jelu tupi sida betuchuk vaksin rabies ungkup pengelikun diri empu enggau semua.