Direktor DBKU, Dr. Morshidi Ahmad madahka yayasan nya patut ditumbuh dikena mantu KJM ngiga belanja ungkup aktiviti.

“Belanja ari DBKU bisi tatak dikena mantu KJM. Nya alai kitai merambu deka numbuhka Yayasan KJM.

“Nengah yayasan tu baka bala menteri enggau piak swasta ulih meri belanja dikena mantu KJM, “ku iya.

Morshidi mansutka pekara nya dalam jaku pengelalu pengawa nutup ‘Woksyop Kejiranan Selamat 2019’, ti diatur DBKU ba sebuah hotel ditu, kemari.

Pengawa nutup woksyop nya dipenyadi Menteri Dagang Temuai, Seni, Main Asal, Nembiak enggau Lumba enggau Main, Datuk Abdul Karim Rahman Hamzah, ti mega nyadi Chairman PEMADAM Negeri Sarawak.

Tuju woksyop tu diatur endur berandauka chara nyikap orang ke bekaul dikena nentuka komuniti mengeri lebih likun ba pekara fizikal enggau rama.

Lebuh ke ngenang pasal woksyop nya, iya madahka nya udah ngasilka mayuh input sereta asil nya ulih dikena sereta dikemeranka nitihka guna enggau tagit ke udah ditetapka nengah siti output iya nya Manual Kejiranan Selamat to deka dichelak.

Manual Kejiranan Mesra DBKU nya ulih ke lalau ketuai komuniti dikena betapi enggau penanggul bekaul enggau pengelikun ba genturung pendiau diri.

Iya ngarapka semua output sekumbang woksyop nya tau nyadika lalau dikena ngemanahka agi sistem KJM ke udah bisi sereta nyadika ltegap agi enggau ngembuan objektif ti lebih nyengenda.

“Woksyop tu mega dikearapka meri empas positif sereta semangat baru ngagai semua pesereta ti udah meri perambu enggau penemu sida diterima sereta dikena kami (DBKU) enggau manah.

“Ngena Manual Kejiranan Selamat nya kitai ulih nyapai objektif mengeri likun baka nagang ulah ngerusak reta tengkira enggau nyawa baka kes ngeruntun, ngeruga rumah, enchuri enggau ke bukai,” ku iya.

Nitih ku iya, ari baruh DBKU bisi 50 buah KJM.

Ku Morshidi, KJM bisi ngayanka asil kelebih agi ba pekara ekonomi baka nyungkak penatai pemisi ba kandang endur nya nengah aktiviti ke diatur.